សញ្ញាព្រមានដំបូងទាំង ១៣ បង្ហាញថា ជាតិស្ករក្នុងឈាមរបស់អ្នកឡើងខ្ពស់ អាចឈានដល់ជំងឺទឹកនោមផ្អែម
ជំងឺទឹកនោមផ្អែម មិនមែនអាចកើតឡើងចំពោះតែមនុស្សចាស់នោះទេ ព្រោះថាក្នុងពេលបច្ចុប្បន្ននេះ ក៏មានមនុស្សវ័យក្មេង ឬវ័យកណ្ដាលជាច្រើន កំពុងតែប្រឈមមុខនឹងជំងឺមួយនេះ។ យ៉ាងណាមិញ នេះជារោគសញ្ញាព្រមានទាំង១៣ ជារោគសញ្ញាដំបូង ដែលអាចបង្ហាញឱ្យឃើញថា អ្នកកំពុងតែឈានទៅរកជំងឺទឹកនោមផ្អែមនេះហើយ។
១. បត់ជើងតូចញឹកញាប់
ប្រសិនបើអ្នកឃើញថាខ្លួនអ្នក ឧស្សាហ៍បត់ជើងតូចញឹកញាប់នៅពេលយប់ ដែលជាអាការៈខុសពីរាល់ដង វាអាចបង្ហាញពីជំងឺទឹកនោមផ្អែម។
២. ស្រវាំងភ្នែក
ការស្រវាំងភ្នែក អាចមិនមែនមកពីបញ្ហាជំងឺភ្នែក ឬម្ញូបនោះទេ តែវាអាចជាសញ្ញាមួយក្នុងចំណោមសញ្ញាទាំង១៤ ដែលបង្ហាញថា ជាតិស្កររបស់អ្នកកំពុងតែកើនឡើង។
៣. មាត់ស្ងួត
ប្រសិនបើមាត់របស់អ្នកមានអារម្មណ៍ស្ងួត សូម្បីតែក្រោយពេលផឹកទឹក អ្នកគួរតែពិនិត្យខ្លួនអ្នកឱ្យដឹងពីជំងឺទឹកនោមផ្អែមនេះ។
៤. ស្រេកទឹក
ស្រេកទឹកខុសពីសព្វមួយដង ទោះបីទើបតែផឹកទឹករួចក៏ដោយ ក្នុងខ្លួនអ្នក ហាក់ដូចជាខ្វះជាតិទឹកអ៊ីចឹង។
៥. របួសមិនងាយជា
ជំងឺទឹកនោមផ្អែម តែងតែពន្យារពេលនៃដំណើរការមុខរបួសរបស់អ្នក វានឹងធ្វើឱ្យរបួសរបស់អ្នកមិនងាយជាសះនោះឡើយ។
៦. ការផ្តោតអារម្មណ៍ខ្សោយ
កង្វះការផ្តោតអារម្មណ៍ គឺជាលទ្ធផលមួយទៀតនៃជំងឺទឹកនោមផ្អែម។ អ្នកតែងតែមិនអាចគ្រប់គ្រងលើអារម្មណ៍របស់ខ្លួនឯងបានទាល់តែសោះ។
៧. ការបង្ករោគដែលកើតឡើងដដែលៗ
ដូចជាស្នាមរបួសអាចចំណាយពេលយូរដើម្បីជាសះស្បើយ ការបង្ករោគដែលអ្នកធ្លាប់មានក៏អាចនឹងកើតឡើងដដែលៗដែរ។
៨. បញ្ហាក្នុងការរំលាយអាហារ
បញ្ហារំលាយអាហារ ដូចជាចង្អោរ និងក្អួតជារឿងធម្មតានៅពេលដែលអ្នកមានជំងឺទឹកនោមផ្អែម។
៩. បង្កើនចំណង់អាហារ
ឃ្លានចម្លែក ញុំាច្រើនយ៉ាងណាក៏មិនឆ្អែត អ្នកគួរតែធ្វើតេស្តឈាមរកជាតិគ្លុយកូស។
១០. បញ្ហានៃសរសៃប្រសាទ
យូរៗទៅជំងឺទឹកនោមផ្អែមអាចបំផ្លាញសរសៃប្រសាទរបស់អ្នក ហើយអ្នកអាចមានអារម្មណ៍ឈឺដៃជើង និងកន្លែងផ្សេងៗទៀត។
១១. បញ្ហាស្បែក
ស្បែករបស់អ្នកអាចប្រែជាស្ងួត និងរមាស់ ហើយអ្នកងាយនឹងឆ្លងបាក់តេរី និងផ្សិត។
១២. ការឡើងទម្ងន់
ភាពធាត់មិនត្រឹមតែជាសញ្ញានៃជំងឺទឹកនោមផ្អែមប៉ុណ្ណោះទេ តែវាក៏ជាលទ្ធផលរបស់វាផងដែរ។ ការឡើងទម្ងន់ខុសប្រក្រតី ជាបញ្ហាមួយដែលអ្នកគួរតែផ្ដោតអារម្មណ៍ និងយកចិត្តទុកដាក់ឱ្យមែនទែន។
១៣. អសមត្ថភាពផ្លូវភេទ
សម្រាប់អ្នកមានគ្រួសារ ហើយពិបាក ឬគ្មានអារម្មណ៍រឿងលើគ្រែ ឬពិបាកយកកូន អ្នកប្រហែលជាកើតជំងឺនេះដោយប្រការណាមួយហើយ។
នេះគឺជារោគសញ្ញាទាំង១៣ដំបូង ដែលអ្នកគួរតែយកចិត្តទុកដាក់ ប្រសិនបើអ្នកមានហានិភ័យខ្ពស់នៃជំងឺនេះ។ សូម្បីតែរោគសញ្ញាមួយក្នុងចំណោមរោគសញ្ញាទាំងនេះ ក៏អាចជាសញ្ញាមួយដែលអ្នកត្រូវធ្វើតេស្តឈាមគ្លុយកូសផងដែរ។ យ៉ាងណាមិញ អ្នកគួរតែទៅជួបគ្រូពេទ្យដើម្បីពិនិត្យ និងពិគ្រោះឱ្យបានកាន់តែច្បាស់៕
ប្រភព ៖ stylecraze. / ប្រែសម្រួល ៖ ភី អេក (ក្នុងស្រុក)
Recent News
