ឧស្សាហ៍ស្ងួតបំពង់ក ស្រេកទឹកឥតឈប់ កុំគិតថាមិនអី នេះវេជ្ជបណ្ឌិតព្រមានជំងឺ ៤ យ៉ាង
ប្រសិនជាអ្នកតែងតែមានអាការៈស្ងួតមាត់ ហើយស្រេកទឹកឥតឈប់ បើទោះបីទើបតែទទួលទានមួយកែវធំហើយនោះ វាទំនងជាចូលទៅក្នុងជំងឺ ៤ ខាងក្រោម បើផ្អែកតាមការបង្ហាញរបស់វេជ្ជបណ្ឌិត៖
៤) ជំងឺទឹកនោមផ្អែម
នៅពេលដែលយើងមានជំងឺទឹកនោមផ្អែម ជាទូទៅជាតិគ្លុយកូសនឹងមានការកើនឡើងនៅក្នុងឈាម ដែលបង្ខំឲ្យតម្រងនោមធ្វើការយ៉ាងខ្លាំង ដើម្បីព្យាយាមស្រូបយកវា។ ប្រសិនបើតម្រងនោមរបស់អ្នកមិនអាចដំណើរការបានត្រឹមត្រូវ នោះរាងកាយនឹងបញ្ចេញទឹកនោមមកច្រើនជាងធម្មតា។
ដំណើរការនេះ នឹងធ្វើឲ្យយើងមានអារម្មណ៍ស្រេកទឹកឥតឈប់។ ដូច្នេះប្រសិនបើអ្នកនោមញឹកញាប់ ហើយចេះតែឧស្សាហ៍ស្រេកទឹក លាយឡំនឹងការស្ងួតមាត់ផង នោះជាសញ្ញាព្រមានថាអ្នកអាចមានជំងឺទឹកនោមផ្អែម។
៣) ជំងឺ Anemia
ជំងឺ Anemia គឺជាស្ថានភាពដែលរាងកាយមិនមានកោសិកាឈាមក្រហមគ្រប់គ្រាន់ ហើយបើបន្តរយៈពេលយូរ វានឹងធ្វើឲ្យអ្នកឆាប់អស់កម្លាំង និងផ្តោតអារម្មណ៍ទៅលើរឿងអ្វីមួយមិនសូវបានល្អឡើយ។ ពេលវាវិវត្តកាន់តែធ្ងន់ធ្ងរ អ្នកនឹងមានអារម្មណ៍ស្រេកទឹកខ្លាំង ហើយទោះទទួលទានទឹករួច ក៏នៅតែមានអាការៈផ្សេងទៀតដូចជាវិលមុខ ឈឺក្បាល បែកញើស និងមុខឡើងស្លេកជាដើម។
២) ការកើនឡើងលើសនៃជាតិកាល់ស្យូមក្នុងឈាម
បើកម្រិតជាតិកាល់ស្យូមក្នុងឈាមរបស់យើងឡើងលើសពីធម្មតា នោះនឹងបណ្តាលឲ្យរាងកាយមានអាការៈស្រេកទឹកខ្លាំងជាប់ជានិច្ច។ ផ្សេងពីនេះ អមដោយរោគសញ្ញាផ្សេងទៀតដូចជាការនោមញឹកញាប់ ឈឺពោះ ទល់លាមក ឈឺឆ្អឹងនិងខ្សោយសាច់ដុំ ហើយចង្វាក់បេះដូងលោតមិនទៀងទាត់ជាដើម។
១) ជំងឺ Xeostomia
វាដូចជាបញ្ហាមាត់ស្ងួតអ៊ីចឹង ហើយអ្នកខ្លះច្រឡំថា គ្រាន់តែដោយសារការស្រេកទឹកធម្មតា។ តាមពិតទៅវាបណ្តាលមកពី ការថយចុះនៃក្រពេញទឹកមាត់។ ដូច្នេះដើម្បីដោះស្រាយបញ្ហានេះបាន អ្នកគួរមានទម្លាប់ទំពារស្ករកៅស៊ូជារឿយៗ ដើម្បីជួយជំរុញឲ្យក្រពេញទឹកមាត់ដំណើរការល្អឡើងវិញ។ តែយ៉ាងណាបើយល់ល្អ អ្នកគួរតែទៅជួបអ្នកឯកទេសដើម្បីពិនិត្យសុខភាព និងទទួលយកការព្យាបាលដ៏ត្រឹមត្រូវ៕
ប្រភព៖ បរទេស | ប្រែសម្រួល៖ ក្នុងស្រុក
Recent News
